«Sakeak ondo egiten ditut, baina eskuinetara hobeto botatzen ikasi behar dut»

Iraitz_Genbelzu_Realeko_at

Iraitz Gelbenzu, Realeko kadete mailako atezaina.

Iraitz Gelbenzu (Lazkao, 2000) Lazkaoko pilota eskolako arduradunaren semea da. Berak ere pilotan jokatu zuen, baina Realak deitu zionean utzi egin zuen, kadete mailako taldeko atezaina da eta saria jaso du Lopez Ufarte txapelketan.

Aita pilota zalea duzu. Nolatan zu futbolari?

Aitak ere futbolean jokatu zuen, gaztetan. Eta nik pilotan ere jokatu nuen. Realak deitu zidanean utzi nuen, astero hiru aldiz joaten bainaiz Zubietara entrenatzera.

Zer nahiago duzu, pilota ala futbola?

Egun, futbola. Baina mutikotan pilota gehiago gustatzen zitzaidan.

Nolatan atezain?

Lazkaoko taldeak ez zuen atezainik, probatu egin nuen eta gustatu egin zitzaidan. Duela bi urte izan zen hori.

Zein izan da zure ibilbidea futbol munduan?

Hasi bezain laster, nota txarrak atera nituen eta gurasoek futbola uztera behartu ninduten. Nota onak atera nituenean, berriro futbolean hasi nintzen. Handik gutxira Realak deitu zidan. Hasieran astean behin joaten nintzen eurekin entrenatzera. Aurtengoa lehen denboraldia dut taldean. Taldeko jokalari guztiok txandaka jokatzen dugu, guztion garapena neurtu nahi baitute. Oso gustura nago Realean.

Atezain hasi eta berehala Realaren deia jaso zenuen. Argi dago dohainak dituzula. Nolako atezaina zara?

Altua naiz eta ateko sakeak ondo egiten ditut. Hankekin ondo jokatzeari garrantzia handia ematen diote. Irteeretan ere ona naiz, baina eskuinetara hobeto botatzen ikasi behar dut.

Hobekuntza nabaritu al duzu Realera joan zarenetik?

Bai. Atezainok entrenatzaile bat dugu guretzat bakarrik: Raul Iglesias.

Zein da zure gustuko atezaina?

Manchester United taldeko De Gea. Realeko Rulli eta Zubikarai ere onak dira.

Zure taldean goierritar gehiago ba al daude?

Bai: Ander Zoilo ordiziarra, Imanol Galarreta beasaindarra eta Gerardo Ramirez zegamarra.

Nola ikusten duzu etrokizuna?

DBH3 egiten ari naiz eta oraindik ez dut erabaki DBH bukatzen dudanean zer egingo dudan. Futbolari dagokionez, lanean jarraituko dut. Baina badakit profesionaletara heltzea oso zaila dela. Datorren urtean jakingo dute Realean jarraituko dudan edo ez, Realak bi urtetik bi urtera berritzen baititu gazteen taldeak.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude


Ondorengo XHTML etiketa eta atributuak erabil ditzakezu: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>