Igor Susaeta • Kazetaria
Udako oporralditxotik itzuli berritan, medikuren batena baino letra kaskarragoarekin, eta ziurrenik aharrausika, nola bestela, apunteak hartzen ari nintzen Iñigo Urkulluk esandako zerbaitek barreneko alarma guztiak piztu zituenean. Ez dut gogoratzen zergatik asaldatu nintzen, baina han, Miramar jauregiko aretoetako batean txintxo-txintxo eserita, besoa altxatu nuen lehendakari jaunari galdera bat egiteko. Erantzuten ari zitzaidan bitartean konturatu nintzen, bai, ai ene, erretzeari uzteko saioak egiten egon nintzen opor egun horietan eman zituela galdetu nionari buruzko azalpenak. «Amen, Iñigo». Offside sentitu nintzen lehendakariaren eta sailburuen aurrean, baina harro esan dezakat Urkulluren begirada sarkorrari eutsi niola dozena bat segunduz.
Ni ez nintzen lotsagorritu, baina antza, lehendakaria bera ere ez da lotsagorritzen izurria dela eta ezarritako neurriez hitz egiten duen aldiro herritarrak mehatxatzen dituenean. Tonu apaizkoi geroz eta mehatxagarriagoa darabil gizonak, gainera. Lehengo astean adierazi zuen, adibidez, herritarren «diziplinak» gora egiten duen neurrian, «muturreko neurriak» saihesteko aukera gehiago egongo direla. Hau da, autokritikarik egin ez eta erantzukizuna herritarron bizkar uzten dutela erakunde publikoek. Irrati batean egin zituen adierazpenok, baina fantaseatzen hasita, berriro halako zerbait esango duen lekuan egon nahiko nuke, galdera bat aho bilorik gabe planteatzeko: «Lehendakari jauna: zer sentitzen da pulpitutik jendea mehatxatuta?». Eztarria korapilatuta eta aurpegia irakiten edukiko nuke, bai, baina Urkulluren begiekin topo egin nahiko nuke une horretan. Leonard Cohenek hil baino lehen esan zuen bezala: «I’m ready my lord».
Eta behin heroiarena egiten hasita, PSE-EEkoei galdetuko nien ea zer arraio dabiltzan lehendakariari kargu hartu gabe. Tira, alferrik izango zen, eskua jartzen eta azalpenik ez eskatzen, ez ematen, ikasi dutelako. Nire zalantza da jada gorri ez diren berdeek eta moreek elkarrekin egiten dituzten bileren ondoren zergatik ez dizkioten lehendakariari mehatxu horiek aurpegiratzen.
