Aztiriatik Otañura, Aizpuruko begiratokitik itzulingurua eginez

Gabiriako Aztiria auzoan hasi eta bukatzen da ibilbide zirkular hau, erretegiaren ondotik (605 m.). Hasierako metroak 500-600 metroak GR arrastoei segituz egin behar dira baserri bide batean (GR-120), eta hortik Otaño-Otañu mendira (834 m.) bitarteko zatia Aztiriko mendi lasterketaren arrasto arrosak erreferentzia modura hartuta, Legazpiko lurretan. Beherakako zatirik handiena Zerain eta Mutiloako muga-lurretan egiten da abiapuntura itzuli arte, tartean Aizpuruko gaina (698 m.) ezagutuz.

Aztiriako kaskoan jatetxea, Aztiri-Bat elkartea, Santa Marina ermita eta bolatokia ikusiko ditu oinezkoak. Iturria ere badu plazatxoan. Parean ikusten den langa gurutzatu beharra dago ibilbideari ekiteko, Biurraingarakoa baserri aldera. Hara iritsi aurretik baserri bidea utzi –azti bidegurutze horretan–, eta goraka egin beharra dago ezkerrera zabaltzen den bidetik. Pinudi baten gora aurrena, eta leku irekiagoan bukaeran, 40 minuturen bueltan iristen da ibilbide honen puntu gorenera.

Gain airoso eta zelaitsua da Otaño-Otañu, eta pare-parean ditu Aizkorri-Aloñako gailurreria, eta eskubitara urrutirago Udalaitz eta Anboto. Akerra mendigoizaleari eskainitako monolito bat, puntu geodesikoa eta aizkora ditu tontorrean. Legazpiko Telleriarte auzoko lurretan dago tontorra.

Aizpuruko begiratokitik itzulera

Otaño-Otañutik pinudi batean behera aldapa piko-piko batean behera jaitsi ondoren, ibilgailuentzako moduko pista batean egingo dugu hurrengo kilometro eta erdia, Oraiturrieta eta Zabarain inguruak zeharkatuz. Una batean bide hori utzi, eta Aizpuruko gain aldera (698 m.) jotzea da ibilbide honetan egindako aukera. Zerain eta eta Mutiloa arteko muga eremuetan. Begiratoki aparta da. Beheko zuloan Zeraingo Aizpea auzoak eta meategiko labeak ikus daitezke, eta begirada luzatuta, Goierri bailara eta Aralar osoa.

Itxitura kontran Aizpuruko txabolaraino jaitsi, hura ezagutu, eta Alustitzaingo ganadu harrapalekuan atzera bidearekin egiten da bat, Mutiloako lurretan. Ezkerretara, Segabarruti izeneko parajean, eraikin batzuk ikusiko ditu oinezkoak. Kilometro eta erdi egin behar dira pistan –hasieran leku irekian, bukaeran pinudian–, Aztiriara doan errepidearekin bat egin arte. Metro batzuk bide bazterretik egin eta gero, ezkerretara sumatzen den herri-bidea hartu beharra dago auzo-kaskora itzultzeko.