Gabiriatik Gaintxikira, Leharrei lasterketaren ibilbideari jarraituz

Gabiriako plazan (420 m.) hasi eta bukatzen da hamabi kilometroko ibilbide zirkular hau . Plazan bertan, ikurrinaren ondoan, iturria dago, eta haien parean ikusten den bideari heldu behar zaio Ardantza aldera joateko. Handik, Murgil gaina, Pagoeder, eta Trapalatatik Gaintxikira arteko hegi guztia zeharkatuta, Urkuxuko sakonetik Zuazola auzora jaisten da, atzera herri kaskora igotzeko. Leharrei mendi lasterketaren lehen zatia osatzen du ibilbideak.

Kilometro erdi pasatxo pistan eginda, Ardantzara iristen da. Egurrezko eserleku bat dago, eta baita plaka bat ere 1936ko gerran ibilitako gabiriar guztien omenez jarria 2012ko Aberri Egunean. Hogei metro aurrerago, baserri bidea utzi eta eskubitara hartu beharra dago Murgil mendi aldera, bertako zuhaitzei buruzko panel baten ondotik. Hantxe hasten da Murgil gainerako igoera (514 m.). Madariagagoikoa zozkerako pinudian sartuta Pagoederrera iristen da (545 m.), eta baita beheraxeago duen aterpera. Mendi lasterketako arrasto fuksiak dira erreferentzia.

Trapalatatik Gaintxikira

Zidor eta bide asko dago eremu honetan, eta karrerako arrastoak eta GR-arenak tartekatzen dira. GPSa lagungarri ona da lekua ezagutu ezean. Pinudi barreneko bide nahas-masean, Trapalata gainera (642 m.) ailegatzen da, eta bidezidorrari helduz, 500 metroan Goitegimendira (635 m.) eta aurreraxeago Potzuetagañara (622 m.), Gabiriaren eta Legazpiren arteko mugan. Handik Arrasatera eta Gaintxikira (587 m.) iristen da, hegian. Legazpiren ikuspegi ederra dago bertatik. Ibilbidearen erdia baino gehiago osatuta.

Basoegin hasten da jaitsiera, arrasto fuksiak gidari direla. Gabiriaren eta Aralarren ikuspegi ederra dago bertatik. Atagoitirako errepidean metro batzuk eginda, basora sartu behar da berriz, eta bidezidorretan behera egin. Pinudian hasieran eta ur-ertzeko baso mistoan ondoren, altuera galtzen du ibilbideak, eta tartean erreka-ziztor bat edo beste gurutzatu beharra dago –Urkuxu horietako bat–.

Urkuxu errekastoa behin baino gehiagotan gurutzatu ondoren, Zuazola auzora iristen da (10. km / 302 m.). Toki horren uzten da Leharrei lasterketaren bidea. Oñatibitxiki baserria eskubitara dela, Korta jatetxe aldera –Zuazola azpikoa– igo beharra dago. Errepidean metro batzuk eginda, Kaminogurutze baserriaren ondotik egin beharra dago Gabiriako herri kaskora arte dagoen hogei minutuko bidea.