Urkillagatik Agautzera, baso, larre eta leize artean

Ataungo Aiako Urkillagako gaina eta Agautz mendia lotzen dituen ibilbide zirkular honek. Mendatearen ertz batean dagoen aparkalekutik abiatu, artadia, pagadia eta larreak zeharkatuta, Aralarren ikuspegi paregabea duen Agautz mendira iristen da. Sarastarriko gainera igo eta hango kobara sartzeko aukera ere ematen du ibilbide honek Lareoko urtegira pagadian behera jaitsi aurretik. Aralarko parke naturalaren barruan dago.

Bostehun metro pasako garaieran abiatzen da ibilbidea, Urkillagako gainean. Hantxe bertan Agautz mendia 3,5 kilometrora dagoen seinalea ikusiko du ibiltariak. GR arrasto zuri-gorriei jarraika egin beharra dago bidea, hasieran artadian, eremu misto batean gero, goraxeago pagadian eta azkenik larre eremu batean. Hango ertz batean dago Muñoaundi edo Agautz mendiaren gailurra (974 m.). Eremu garbi eta haizetsua da.

Agautzeko gailurretik Lareora

Aizkoate, Intzartu eta Arastortzeko gailurreria alde batean, Ausa-Gaztelu, Txindoki eta Aralako goi-larreak bestean eta Nafarroa aldera begiratuta, pagadi zabalak eta Lareoko urtegia sumatzen dira. Agauztik Sastarri alderako noranzkoa hartu beharra dago GR arrastoei segika, harresia eskubitara utzita. Hor hastean da beheranzko bidea, pagadian dagoen bidezidorrari jarraituz Lareoko urtegirantz (745 m).

Lareo inguratzen duen pistan metro batzuk egin eta gero, bidea ixten duen langa batera iristen da. GR arrastoek Lareotik Lizarrustira joateko bidea adierazten dute. Horiek ezkerretara utzi, langa gurutzatu eta Urkillagako gainera doan pistari jarraitu behar zaio. Lau kilometro dira pistaz.