Besteak beste, eskalada ikastaroak egingo dituzte gaztetxean.
Urte berriarekin batera, Beasaingo Gaztetxea nobedadez beteta dator. Jaialdiak, kontzertuak, hitzaldiak, zine foruma eta festaz gain, tailer edo ikastaro zerrenda mardula osatu dute. Ikasi nahi dutenen zerrenda egin eta hamaika tailer antolatu dituzte. Irekiak dira ikastaroak; doakoak. Izena ematen dutenen artean erabakiko dute ikastaroaren eguna eta ordua. Gaztetxean edo Facebook bidez eman behar da izena.
Hainbat helburu
Beasaingo Gaztetxetik jakinarazi dutenez, hainbat helburu dituzte tailerrek. Batetik, informazioaren elkartrukaketa egitea. Ikastaro batzuk gaztetxeko kideek emango dituzte. «Oinarrizko ikasgaiak ikastea ondo etortzen da bizitzarako, pertsona bezala hezteko eta aberasteko», diote gaztetxekoek. Rolak haustea ere bada tailerren helburua. «Photoshop ikastaroarekin jende gehiago jarri nahi dugu kartelak egiten, gaztetxean beti berdinek egiten dituzte eta kartelak».
Jendea ezagutzeko ere baliagarriak dira ikastaroak gaztetxekoen esanetan: «Jendea ezagutzeko aukera ona da. Kontzertu asko egiten dira baina jendea batez ere lanean edo antolaketa lanean ezagutzen da».
Gaztetxetik gogoratu dutenez, ostiralero batzar irekia egiten dute 19:00etan gaztetxean bertan.
Ikastaroak
Askotariko ikastaroak eta tailerrak antolatu dituzte Beasaingo gaztetxean. Urtarril bukaeran edo otsailean hasiko dira.
Liburuak azaleztatzea.
Photoshop-a. Oinarrizko erabilera.
Musika ekipoa. Muntaketa eta erabilera.
Monozikloa.
Mekanika. Ibilgailuen oinarrizko mantentzea.
Eskalada.
Sormena.
Masajea.
Jolasak.
Clown.
Zirkoa.
