Iazko Gabonetan, goierritarrik ezkorrenek, «datorren urteko Gabonetan ere berdin egon gara» zioten. Eta itxura guztien arabera, 2021eko Eguberriak ere, ez ohikoak, COVID-19ak baldintzatutakoak izango dira. Elkar zaintzekoak. Azken egunetako bilakaera ikusita, gainera, neurriak zorrozten joango direla dirudi. Beraz, aurten ere, inork nahi ez duen birus gonbidatuarekin eta maskara lagun dugula ospatuko ditugu Eguberriak. Hala ere, irudimenarekin, ilusioarekin eta gogoarekin, giro bereziko egunak izango dira urte amaierakoak.
Goiberri-ko eta Goierriko Hitza-ko irakurleok esku artean duzuen Eguberrietako liburuxka hau horretara dator beste urtebetez. Erosketak egiteko gomendioak emanez, etxea lorez apaintzeko proposamenak luzatuz, otorduetarako lana errazteko ideiak aurkeztuz… Hori guztia, denbora pasez, Gabon kantuez eta abenduko agendaz lagunduta. 2000ko abenduaren 31n Gabirian egindako karretilla lasterketaren kronika ere ekarri da liburuxkara.
Eta nola ez, Olentzerori eta Mari Domingiri desioak eta opariak eskatzeko gutuna ere aurkituko duzue barruan. Aurrez aurre eurekin hitz egin eta gutuna emateko aukera izango dute aurten haurrek, Goierriko txoko desberdinetan bisitan etorriko baita bikotea.
