Ingudea batzordeko kideak 2019an. Gaur egun, jada horietako batzuk ez daude taldean.
Euskara teknikariren bat edo «euskararekin proaktiboki lan» egiten duten enpresen Goierriko enpresen sarea da Ingudea. 2011n sortu zen eta une honetan CAF, Ederfil- Becquer, Eredu, Goieki, Goilaser, Irizar, Ampo, Indar eta Ulma Lazkao daude.
Gaur egun bederatzi enpresek osatzen dute Ingudea. Goiekiko Xabi Perezen esanetan, hala ere, talde irekia da. Enpresa bakoitzak indibidualki egiten duen lana partekatzeaz gain, «ideiak hartu eta ideiak partekatzeko balio du» sareak. Honela, «harrera planak nola dauden aztertzen ditugu, euskara planak nola dauden, komunikazioan euskara nola txertatzen den aztertzen da… Euskarari zein garrantzia ematen zaion enpresaren funtzionamenduan…».
Elkarrekin ere antolatzen dituzte ekintzak, batez ere, abenduaren 3an, Euskararen Nazioarteko Egunaren harira. Telp ikastaroa da horietako bat. «Irizpide batzuk ematen ditu ikastaroak, batez ere aurrean duzun solaskidea nola euskarara ekarri. Batez ere, arreta zuzena ematen dutenei edo jende ezberdinekin egoten diren pertsonei erramintak ematen dizkiete, parekoak dena gazteleraz egiten badizu, nola euskarara ekarri elkarrizketara».
Ikastaro hori antolatzeko gutxieneko kopuru bat behar izaten da eta enpresa bakoitzean taldea osatzea zaila denez, Ingudeko enpresa guztien artean lortzen da taldea.
Egunean Behin lehiaketa
Bestalde, urtero abenduaren 3aren bueltan lehiaketa bat antolatzen dute elkarrekin. «Egunean Behin lehiaketaren antzeko zerbait izaten da. Hamar galdera jartzen ditugu eta sariak banatzen ditugu». Ingudeko enpresetatik kanpora ere zabaltzen dute lehiaketa, Goierriko Hitza egunkariko webguneari esker. «Datozen egunetan jarriko dugu martxan. Enpresen, euskararen eta Goierriren inguruko galderak izaten dira».
Abenduaren 3ra arteko epea egongo da galderak erantzuteko. Bi sari izaten dira: batetik, Ingudea sarea osatzen duten enpresetako kideentzat, eta bigarrena, parte hartzen duten goierritarrentzat.
