Julen Arakama • Zinemazalea
Hilabete eskasean estreinatuko dira zine aretoetan urtean zehar ikusmin gehien piztu duten lau film. Requiem por un sueño, El luchador eta Cisne negro zuzendu dituen Darren Aronofskyk loditasun arazo larri bat duen irakasle batek bere alabarekin galduta duen erlazioa berreskuratzeko egingo duen azken ahalegina pantailaratzen du The Whale-n. Brendan Fraser antzezlearen muturreko transformazio fisikoak zeresana eman du; batzuentzat film hunkigarria eta besteentzat gehiegikeria erakustaldi bat. Ikusi ondoren eman beharko dugu iritzia.
Cannesko Urrezko Palmondoa bigarren aldiz lortu du Ruben Östlund suediarrak El triangulo de la tristeza filmarekin. The Square filmarekin ere garaitu zuen zuzendariak bere horretan jarraitzen du komedia beltza eta satirarekin, oraingo honetan luxuzko yate batetan kokatuz gertaerak, kapitalismoa eta klase borroka jopuntuan ipiniz.
Tres anuncios en las afueras film bikaina ekarri zigun Martin McDonaghen azkena XX. mende hasierako Irlandan kokatzen da eta betidaniko bi lagunen arteko laguntasunaren bat-bateko amaiera kontatzen digu. Almas en pena de Inisherin filma, Brendan Gleeson eta Colin Farrell antzezleek irudikatutako sestraren bitartez, gerraren metafora gazigozo bat bezala ere irakur daiteke.
Azkenik Park Chan-wooken Decision to leave thriller dotore eta erromantikoa daukagu. Old Boy eta La Doncella maisulanetako indarkeria estilizatua alde batera utzi eta heriotza misteriotsu bateko ikerlaria eta hildakoaren emaztearen arteko joko sensual eta korapilatsua eskaintzen digu. Estetikoki oso film landua, zaila da antzezleak kokatzen dituen eremua hain ondo zaintzen duen beste zuzendari bat aurkitzea.