Osagaiak
Pertsonako
- Uso bat
- 2 tipula
- Porru 1
- Azenario 1
- 2 baratxuri ale
- Gatza eta piper hauts beltza
- 2 ontza txokolate
- Haragi salda
- Koñak kopa bat
- Ardo botila bat
Prestaketa
Alde batetik usoak oliba oliotan alde guztietatik ondo gorritu behar dira eta ondoren koñakarekin flanbeatu.
Beste aldetik ondo txikitutako tipulak, porrua, azenarioa eta baratxuriak gorritzen jarri behar dira, oliba olioarekin. Gatza eta piper hauts beltza gehitu. Gorritzen direnean ardo beltza, txokolatea eta haragi salda gehitu. Su eztian ondo egiten utzi. Ondoren birrindu eta kazola batean usoekin batera jarri. Su eztian hiru bat ordu behar dute, usoak ondo samurtu arte.
Aurkezpena
Usoa plater batean jarri, saltsarekin busti eta panadera patata batzuekin lagundu.
Arantxa Agirrezabala, Kattalin erretegia
Arantxa Agirrezabala eta Juan Manuel Garmendia senar-emazteek 1990. urtean ireki zuten Kattalin jatetxe-erretegia Beasaingo Katea auzoan. Gaur egun, bertan jarraitzen du Agirrezabalek senarrarekin hasi zuen bide beretik.
Hasieratik betiko sukaldaritzaren aldeko apustua egin zuten. Kattalin jatetxearen oinarrian kalitatezko produktua egon da beti, garaikoa eta gertukoa. Agirrezabalak oinarri horri eusten dio. Bera bihurtu da parrilako espezialista, txuletaz gain haragi zein arrain preziatuenak bere puntuan prestatuz.
Kattalin jatetxean menu desberdinak daude dasta gai: babarrunena, sagardotegikoa, txangurroarena, nahiz taldeentzat prestatutako hainbat menu berezi.
