TXP marka berria aurkeztu du Txomin Parrillak. Gakoa «urteetan egindako harremanak» direla azaldu du Txomin Dominguezek.
Euskal Herriko hainbat herritan zein nazioartean, parrilletan errekiak eskaintzen ibili da Txomin Dominguez (Beasain, 1970) azken 10 urteetan, bere Txomin Parrilla enpresarekin. Maiatzean 11 urte beteko ditu. Itxura berritua eskaintze aldera eta diseinuko parrillei zabalkundea emateko, marka berritu dute, eta TXP Txomin Parrilla izena eman diote. Bi negozio bide ditu: batetik, errekiak prestatzen dituzte ekitaldi ezberdinetarako, eta bestetik, mota ezberdinetako parrillak diseinatzen ditu. Hiru dituzte salgai. Galdaragile gisa lan egin zueneko esperientzia eta formakuntza baliatuta ekin dio parrilak diseinatzeari.
Txomin Dominguezek berak azaldu duenez, «geldiezina» izan da betidanik, eta horri esker garatu ahal izan ditu bere ideiak. Batzuk ondo atera zaizkio, eta beste batzuk, ordea, ez dira loratu. 16 urte zituenean, Bartzelonara joan zen zestapuntan jokatzera, ondoren Miamira (Amerikako Estatu Batuak) joateko prestatzera. Andoaingo pilota eskolan zebilela izan zen. Ikuskatzaile baten bidez Bartzelonako Jai Alai Palace-era joan zen, bertan entrenatu eta gero zestapuntaren gune nagusira joateko helburuz. «Miamira joateko prebia zen. Baina jada kontratua geneukanean, International Jai Alai Players Association-ek greba hasi zuen. Bartzelonan bi urtez egon nintzen eta etxera itzuli nintzen gero». 90eko hamarkada hasieran pilotarien koadro bat osatu zuten, baina urte eta erdi iraun zuen eta zestapunta utzi zuen hala Dominguezek.
Orduan ekin zion gaur egungo ildoari, zer izango zen jakin gabe, leku batetik bestera. Galdaragintza eta planoen garapenean kurtso bat egin zuen, eta Hermanos Azpeitia zenean lan egiten hasi zen, Zaldibian. CAFen lan egin zuen ondoren, eta 16 urte eman zituen bertan. Beste sei urte egin zituen prefabrikazio enpresa batean, tailerreko nagusi moduan, enpresa martxan jartzeko helburuarekin lan estrategiak garatuz. Lan hori utzi zuenean, eta ikasitakoa motxilan sartuta, oilaskoentzako burruntzi bat erostea erabaki zuen. «Reinosan (Kantabria) gizon bat ikusi genuen oilaskoak saltzen azokan eta esan nuen ‘hau da, negozioa ikusi dut’, eta horrela hasi nintzen».
Hemen eta han
Ekintzailetzarako eta enpresa-sorkuntzarako «berezko interesa» duela dio, eta gaztetatik kasu egin diola bere sen horri. Etxean dagoenean ere, liburuxka batean idazten ditu bururatzen zaizkion ideiak. Oilasko erreak ezin izan zituen saldu, ordea. Dominguezen asmoa Garaioko (Araba) urtegian saltzea zen, baina ez zioten utzi baimenak medio. Basatxerrirekin harremanetan jarri eta probak egiten hasi zen. «Dena eboluzio bat izan da. Hasierako oilasko erreetatik, ez nuen imajinatzen ekitaldi hauek egingo nituenik». Txillidaleku Museoaren inaugurazio ekitaldian izan ziren, eta harrezkero hainbat lekutan izan dira produktuak sukaldatzen. «Aurten Tokiora joateko ideia daukagu».
Maiatzaren lehenean 11 urte beteko ditu Txomin Parrillak, aurrerantzean Txomin Parrilla TXP izango denak. Ibilbidearen garapena etengabeko hobekuntzaren emaitza izan da, «bide progresiboa». Ekitaldietako produktu eskaintzarako, bertako ekoizleekin egiten dute lan. Txominek berak diseinatutako parrilletan, txerrikiak, behiak, arkumeak, mariskoa, arraina edota barazkiak kozinatzen dituzte ekitaldietako parte hartzaileentzat. «Garrantzitsuena da produktu onarekin egiten dugula lan». Eusko Label, Basatxerri, Baserria KM0 eta Euskal Sagardoa markekin egiten dute lan, eta ekitaldi bakoitzerako eskaintza gastronomiko desberdin bat prestatzen dute, esperientzia bakoitzera egokituta.
Elkarlanean oinarritutako jarduna dutenez, enpresaren eta 11 urteko ibilbidearen gakoa «urteetan egindako harremanak» dira Dominguezentzat. «Inportanteena ez dira enpresako elementuak, garatu ditudan harremanak baizik. Deitu eta nire ideia kontatzean, hura garatzen laguntzen dutenak».
Edozein tresneri
Modu horretan garatu zuten azken ideia Unai Agirre Euskal Sagardoa jatorrizko izendapenaren arduradunak eta biek. Sagardo botila formako smoker parrilla bat da, haragia ketzeko. «Arrakasta handia izaten ari da eta pozik gaude, jendeari gustatzen zaio». Dominguezek berak diseinatu du smoker-a, beste parrillak bezala. «Galdaragintza ikasi izana parrillero bezala lan egiteko bonba bat da». Denetariko parrillak dituzte, tamaina eta forma ezberdinetakoak: «50 arkume burruntzian, behiak osorik, txerriak, erretzeko imajinatzen duzun tresneria guztia daukagu».
TXP marka berriaren helburuetako bat, orain arte bezala ekitaldiz ekitaldi produktu gastronomikoak eskaintzeaz gain, parrillen salmenta sustatzea da. Horretarako Txparrilla.eus webgunea sortu dute. Hiru parrilla dituzte salgai: TXP 0120, TXP R70 eta TXPR100.
Pilota munduan murgilduko zela pentsatzen bazuen ere, gastronomiaren eta galdaragintzaren munduan egin du bidea azken urteetan Txomin Dominguezek. TXP marka berrituarekin, catering-ak, bazkari herrikoiak eta aire zabaleko bestelako ekitaldietan puntako produktuak eta errezetak eskaintzeaz harago, galdaragintzako eskolei esker diseinatutako parrillen erronkari heldu dio.
Igartzan aurkeztu dute TXP marka
Txomin Dominguez eta TXP-ko lantaldea eta Unai Agirre Euskal Sagardoa jatorrizko izendapenaren arduraduna, Igartzan. / L.Goiburu
Abadiñoko (Bizkaia) Sorland komunikazio eta publizitate agentziarekin batera garatu du Txomin Parrillak TXP marka berria. Otsailaren 23an aurkezpen ekitaldia egin zuten Beasaingo Igartza Jauregian. Bertan izan ziren, besteak beste, Unai Agirre Euskal Sagardoa jatorrizko izendapenaren arduraduna eta Bittor Oroz Eusko Jaurlaritzako Ekonomiaren Garapen, Jasangarritasun eta Ingurumen sailburuordea. Bere ibilbidearen berri eman zuen Txomin Dominguezek, eta azaldu zuenez, parrillen diseinuen azken etaparekin, «Ameriketan parrillek duten arrakasta hona ekarri nahi» du, horretan aitzindaria izanez. Igartzako ekitaldia bukatzeko, haren parrilletan kozinatutako errezeta desberdinak dastatzeko aukera izan zuten parte hartzaileek.
