Idoia Luzuriaga Garcia • Berdintasun aholkularia
Artikulu hau idazterakoan, Oscar sariak eman berri daude. Oraindik ere ez dut astirik izan sarituak nortzuk izan diren jakiteko baina dagoeneko ikusi ditut hainbat medioetan emakume aktoreen argazkiak eta haien inguruko titularrak. Oso koloretsuak, argalak, zuzenak eta ondo orraztuak daude. Ez dakit gizonak nola joan diren; ez ditut ikusi, sarituren bat alde batera utzita.
Hollywoodetik baino pixka bat gertuago, Malagan, bertako Zinema Jaialdiko sari berezia eman diote Blanca Portillori. Saria Asier Etxeandiak jarri dio eskutan eta Portillo kamiseta zuri, galtza bakero eta zapatilla batzuekin joan da jasotzera. Irudiak badu bere harridura puntua, izan ere Etxeandia trajearekin agertzen da eszenatokian eta saritutakoa ogia erostera joango bailitzan.
Ez da, noski, hausnarketarik gabeko zerbait izan. Berak, oso eskertuta, modu xume eta oso argian, horren arrazoia eta beste zenbait egi adierazi ditu jakinduriaz jositako diskurtso motz batean. Bere esanetan, ez dute paper edo pertsonaia saritu, Blanca saritu dute, bere esentzia; bera. Askoz gehiago esan du, eta benetan merezi du entzutea, batez ere irudia sakratu egiten duen ogibide bat duenaren ahotik. Miresmena baino maitasuna nahiago du; lagunarteko garagardoa festa handietako txanpainaren aurretik aukeratuko luke beti; eta horregatik bere izana igo du eszenatokira. Hollywoodeko alfonbraren gainean bere irudirik onena eman duten emakume hauek txanpain pixka bat edanez gero haren gasak izango duen efektuaz kezka ote duten galdetzen diot nire buruari. Baino han ere izan da alfonbrako jantzia kendu eta galtza bakeroak jantzita agertu denik. Lady Gagak halaxe kantatu du; agian, bera ere, bere izana eta esentzia aldarrikatuz, eta bide batez kantatzen zuen bitartean behar den bezala arnastu ahal izateko.
Artikulu hau publikatzerako beste medioetan gai hau behin baino gehiago agertu izana suposatzen dut. Izan ere irudiaren presioa oso bortitza dela argi geratu da aspaldian. Emakume edo gizonetan gehiago eragiten duenaren inguruan badut nik iritzia, baino orokorrean denek jasaten dugu, eta adinaren arabera, batzuk edo besteek, modu bereiztuan. Horregatik, esanguratsuak iruditzen zaizkit apaindurak alde batera uztea aldarrikatzen dituzten joera hauek. Horrek ez du esan nahi gure itxura hobetu ezin dezakegunik, ezta zenbait baliabide erabilita gurean argi eta dizdira pixka bat jarri ezin dezakegunik ere. Baina bai, biziaren bihurguneak hartzeko purpurinarekin ez pasatzea kontuan hartzea komeni dela.
