Tortilla mota honi izen ezberdinak eman izan zaizkio: tortilla irekia, tortilla alferra… Baina Troskaetan platerei izen originalak jartzea gustatzen zaienez, Ipar Euskal Herrian tortillari ‘moleta’ deitzen zaiolako jarri zioten platerari izen hori.
Osagaiak
- 4 arrautza
- 5 zainzuri berde
- onddoak
- Troskaeta gazta edo gustuko gazta bat
Prestaketa
Onddoak zati txikietan moztu eta zartagin batean gorritu gatz apur bat eta oliba olio oso gutxirekin.
Zainzuri berdeak erditik zatitu, horizontalean eta erdi bakoitza berriro modu bertikalean moztu, zainzuri bakoitza lautan. Hauek ere zartagin batean gorritu.
Zainzuriak atera gabe, onddoak bota zartaginera eta segidan lau arrautzak,irabiatuta, dena su bizian. Tortilla alde bakarretik bakarrik egin behar denez, espatula batekin mugimendu borobilak egin zartaginaren erdialdean, inguruak forma borobila har dezan ez da mugimendurik egin behar ertzetan.
Zartaginetik ateratzeko, plater batekin buelta eman, patata tortilla bat bezalaxe, baina berriro zartaginera bota ordez, beste plater batera atera, berriz buelta emanda.
Berehala gazta birrindua gehitu, pixka bat urtu dadin.
Maide Aldasoro • Ataungo Troskaeta taberna
Troskaeta tabernako alaba, txikitatik amaren eta amonaren ondoan sukaldean aritu da Maide Aldasoro. Pandemia garaian konturatu zen sukaldea gustuko zuela, Euskal Filologiako ikasketak utzi, eta harrezkero lanean eta sukaldaritza ikasten ari da. Etxean ikasitakoa Basque Culinary Center-en egindako ikastaroekin perfekzionatu du.
Troskaetan beti ogitartekoa, sandwichak, hanburgesak eta plater konbinatuak eman dituzte. Pandemiaren ondoren, Maideren ekimenez, aldaketak egin dituzte, eta kartaz kanpo plater landuagoak egiten hasiak dira.
Astebururo kartaz kanpoko platerak aldatzen saiatzen dira: olagarroa plantxan, tortilla irekiak,
lasaña, ravioliak…
