Osagaiak
- 1700-1800 gramo inguruko txuleta
- Gatz larria
- Piperrak egiteko
- Pikillo piperrak
- Olioa
- Gatza
- Azukrea
- Prestaketa
Garrantzitsua da haragia giroko tenperaturan edukitzea. Parrila brasetatik 15-20 zentimetro ingurura jarri, eta 20 minutu inguru behar ditu txuletak egiteko. Parrilan jarritakoan gainetik gatza oparo bota, haragiak hartzen ez duen gatza behera erortzen baita. Buelta emandakoan, beste aldetik ere berdin egin behar da.
Piperrak
Pikillo piperrak labeko ontzi batean jarri, olioa, gatza eta azukre pixka bat gehitu. 120-130 gradutan berotutako labean sartu, txuletak egiten diren bitartean.
Aurkezpena
Txuleta eta piperrak egin bitartean, plater zabal bat parrilan bertan berotzen da. Haragia egin denean, plater beroan jarri, zatitu eta gatz pixka bat bota ondoren zerbitzatzen dute Artzai Enean.
Artzai-Enea, hiru giroko jatetxea
Miguel Garcia arduradunak eta Jose Mari Carrillo sukaldariak zuzentzen duten Artzai-Enea jatetxea berezia da. Hiru solairutan banatuta dago, bakoitzean jangela bat du, eta 120 lagunentzat lekua dago bertan. Igande gauetan eta astelehenetan egun osoz jatetxea itxita egoten da.
Sartu eta beheko solairuan, taberna zabalean, hanburgerrak, plater konbinatuak eta eguneko menua jateko aukera eskaintzen dute.
Bigarren eta hirugarren solairuetan, berriz, menu bereziak, sagardotegiko menua eta karta zerbitzua eskaintzen dute.
Orokorrean sukaldaritza tradizionala da Artzai-Enekoa, «betikoa, amonaren sukaldaritza» diote. Brasa da bertako izarra eta, batez ere, bertan prestatutako txuletak. Horretaz gain, plantxan egindako txipiroiak, eta itsas zapoarekin eta otarrainxkekin egindako entsalada epelak ere harrera ona izaten dute bertaratzen direnen artean. Brasatan arrainak ere prestatzen dituzte.
