Asteburu mugitua dator Goierriko gazteentzat, izan ere, Lazkaon Gazte Festak ospatuko dituzte, aurten seigarren aldiz, eta asteburu osoko egitaraua antolatu dute. Aitzol Sarriegi Irizar (Lazkao, 2006) Lazkaoko Gazte Asanbladako kidea da eta astebururako antolatutakoaren inguruan aritu da.
Nolakoa izan da Gazte Festak antolatzeko prozesua? Zein berezitasun izan ditu aurtengoan?
Urtero bezala, Lazkaoko Gazte Asanbladatik antolatutako festak izan dira aurten ere. Urteroko dinamika bera jarraitu dugu antolatzerako garaian, baina izan dugu berezitasun bat aurtengoan. VI. Gazte Festa hauek gutako askoren lehenengoak izango dira antolakuntzan eta aurten errelebo urtea izan dugu, izan ere, Lazkaoko jaietan jende berri ugari hasi zen Gazte Asanbladan parte hartzen, hau gaztetuz, baita beste batzuei uzteko garaia iritsi ere; beraz, egoera honetan, erreleboa emateko garaia iritsi zen eta badoazen horiengandik zein orain daudenengandik ikasiz antolatu ditugu aurtengo Gazte Festak.
‘Sistemaren balantzan dantzan’ leloa aukeratu duzue aurtengo Gazte Festetarako. Zergatik?
Urtero lelo desberdin bat aukeratu izan da, une horretako problematika bat jarriz erdigunean. Aurtengo kasuan, feminismoaren ildotik joz, Greba Feminista Orokorra izanik azaroaren 30ean, honen garrantzia azpimarratu nahi izan dugu eta presentzia eman nahi izan diogu Gazte Festetan zehar, zaintza sistema publiko komunitarioranzko norabidean hau jaiaren erdigunean jarriz.
Zein aurreikuspen duzue astebururako?
Ez daukagu estimazio zehatzik, baina jende asko ibiliko delakoan gaude, larunbatean batez ere, izan ere, talde ezberdinak izango dira oholtzan eta aniztasun horri lotuta, jende anitza erakarriko dutela talde hauek uste dugu. Talde anitzak ekartzeko apustua egin dugu ahalik eta gustu gehienetara egokitu ahal izateko eta Gazte Festak guztion festa izan daitezen. Bestalde, Goierriko jende ugari ibiliko dela larunbatean uste dugu, elektrotxarangak inguruko herrietako jendea erakarriko baitu eta horrez gain, Sheldons talde beasaindarra ere izango baitugu. Dena dela, espero dugu egindako lanak emaitzak izatea. Ostiralean, berriz, giro herrikoiagoa egongo dela uste dugu, egitarau xumeagoa antolatu baitugu egun honetarako.
Bertara gerturatzeko deia egiten du Lazkaoko Gazte Asanbladak.
Inguruko herrietako gazte guztiak gonbidatu nahi ditugu Lazkakoko Gazte Festetara gerturatzera. Giro polita izango dugu asteburu osoan zehar eta ondo pasatzeko egun bikainak izango dira. Hala ere, Gazte Asanbladaren izenean argi utzi nahiko nuke ez dugula inolako erasorik onartuko, beraz, egoten ez dakiena ez dadila etorri.
