Aitor Artza • Musika zalea
Esku artean beste gauza batzuetan pentsatzen ari ginela, Artza Recordseko 3 anaiok, espero ez genuen proposamen bat etorri zitzaigun Alexen (HHH, Rouse…etab.) eskutik. Talde berri bat sortu dute Alexek berak, Jerry A (Poison Idea), Andrew (Poison Idea), Angi eta Ignasik. Black Bacon du izena. Gure egiteko modu apalarekin bat egin zuten eta proiektua abian jarri genuen. Nork pentsa, gure erreferentzia izan den Poison Idea eta Jerry A. ren lan bat kaleratzeko aukera izango genuenik. 10 kantaz osatutako lana, punk eta HC zuzena eta indarrez betea. Santi Garcia handiak Ultramarinos Costabrava estudioetan nahastu eta masterizatua. Hitzei dagokienez pentsa…. Amets amerikarraren hutsa eta giza jokamoldeen kritikaz gain, satiraz betetako kontuak jasotzen dira haietan.
Black Bacon hitzen joko bat dela esango genuke, hirugihar erreak badu Estatu Batuetan halako esan nahi berezi bat, ‘Bacon’ak amets amerikar delakoa irudikatzen du, sarritan ignorantziaz betea den amestutako bizibide erratua alegia, eta ‘Black’ak berriz, erabat erretzen denean aipatu Bacon hori… Hitz joko horrek ez dela ‘amets amerikarrik’ adierazi nahi du, edo balego, ustela eta ezerez bat dela, alegia.
Eskuan dugu jada lana eta laster ohiko salguneetan izango duzue eskuragai. Jerry A.k Estatu Batuetan argitaratuko du bere American Leather Records argitaletxean. Adi Artza Recordseko sare sozialetan, han zabalduko baititugu salmenta guneak.
Lazkaoko Aho Lehor festa ere badator, eta aurtengo kartela ez da nolanahikoa. Black Bacon izango dira bertan, bai, Jerry A eta bereak Lazkaon ikusteko aukera izango dituzue irailaren 21ean eta dohainik! Beraiekin Flash euskal punk-hc taldea, hauek gainera urrian Estatu Batuetako ekialdeko kostan eta Kanadan bira egingo dute, beraz, haien zuzeneko indartsua ikusteko aukera aparta! Beste bi talde ere izango dira, Katarsi bizkaitarrak (Marmoleko partaideak bertan…) eta Finale mediterraneo aldetik. Biak ere indartsuak zuzenean eta azkenak, Europa aldean behin eta berriz biraka dabiltzanak etengabean! Gau paregabea beraz Lazkaon udari agur esateko! ■
