Gebara jauregia, Segurako Kale Nagusian.
Segurako Gebara jauregia, Nikolas Gebarak 1497 inguruan eraikiarazi zuen, kale Nagusiaren erdialdean dago, Zeraingo Atea dagoen zeharkako kantoiarekin izkina egiten du.
Eta nor izan zen jauregi honen sustatzailea? Nikolas Velez de Gebara, Larriztegiko jauna. 1425 inguruan jaio zen Seguran, eta Oñatiko lehen kondearen, Iñigo Gebararen, ezkontzaz kanpoko semea izan zen.
Oñatiko kondearekiko ahaidetasunak Gonzalo Chaconen, Alfontso eta Isabel printzeen ahaidearen, zerbitzurako onartzea erraztu bide zuen, oso gaztetatik gorteko leku pribilegiatu batean jarriz. Posizio horretan, Errege-erregina Etxeko administrazioan postuak igotzen joan zen, maiordomo nagusiaren teniente postura iritsi arte, eta, beharbada, 1503tik aurrera, Gaztelako erreginaren maiordomo nagusi Isabel I.arena.
Errege-erreginen zerbitzura egoteari esker, bertatik bertara ezagutu ahal izan zituen gorte ibiltaria hartzen zuten errege-jauregiak eta nobleak. Horregatik, bere jaioterrian eraikitzeko agindu zuen egoitzak garai hartako hiri-jauregi askoren antza du, bere eskema tipologikoa errepikatuz:
- Gorputz nagusi bat du eta alboetan bi dorre ditu kale nagusi batekin lerrokatuta.
- Fatxada nagusia kalitate handiko harlanduz egina dago. Erdi-puntuko arkuko sarrera du dobela handiekin.
- Arkuaren gainean, Errege-erregina Katolikoen armarria dago, eta, alboetan Gebaratarren eta Larristegitarren armak dituzten armarriak daude.
- Ezkaratzetik, bi solairu eta arkuteria irekiak dituen patio batera sarbidea du. Eskailera nagusi batek solairu nagusira eramaten du, eta, bertan, egongela handi bat dago, arku trilobulatuko leiho bikiekin.
- Goiko aldeko erlaitzak, bost inizialetako hiru gargola ditu (Gabriel goiaingerua erdian eta alboan bi otso ditu).
Gebara jauregia, Seguran, harriz eraikitako eta zutik mantentzen den eraikin zaharrena izateaz gain, Gipuzkoako errege-erregina katolikoen garaiko Gaztelako jauregi-arkitekturaren adibide oso interesgarria da. ■
