Energia Bulegoan fakturak ulertzen erakusten dute, besteak beste.
Energiaren alorrean goierritarrek izan ditzaketen zalantzak argitzen laguntzea da Goierriko Energia Bulegoaren egitekoa. Euskadiko Kontsumo Saria emanez aitortu diote egindako lana.
Orain bi urteko abenduan martxan jarri zutenetik ibilbide emankorra egiten ari da Goierriko Energia Bulegoa. 2024. urtean 264 kontsulta jaso zituen, eta horiei erantzuteko 391 hitzordu jarri zituen. «Harrera oso ona» izan zela zioen ireki eta urtebetera Sara Irastorza (Zegama, 1998) bulegoaren arduradunak, eta 2025. urteko lehen hiruhilekoak ere pareko datuak utzi ditu: 81 kontsulta eta 96 hitzordu.
Energiaren eta gasaren fakturak ulertzen ikasteko, eta faktura horiek aztertzeko eta optimizatzeko jotzen dute goierritar gehienek bulegora. «Jendeak halako kontsultak aurrez aurre egin nahi izaten ditu, eta gehienak presentzialak izan dira. Emakumezkoak izan dira batez ere (%70), 35-64 adin tartekoak». Iazko balantzean ere profil hori nabarmendu zen, eta aipatzekoa da baita ere 65 urtetik gorako hainbatek ere jo zutela bulegora. Erabiltzaileen %26ek behin baino gehiagotan erabili zuten zerbitzua. «Goierritarrentzat energiaren arloko zalantzak argitzen laguntzeko erreferentziazko leku bihurtzen ari da».
Goieki garapen agentziak, Goierriko 18 udalek eta Gipuzkoako Foru Aldundiak bultzatutako proiektua horrexetarako sortu baitzen, goierritarrei zerbitzu hori emateko. Zerbitzuaren berezitasunetako bat da ez dela Beasaingo, Lazkaoko eta Ordiziako bulego finkoetara mugatzen. Hiru herri horietan astean behin egoten da Irastorza, goizez: Lazkaon astelehenetan (10:00-14:00, udaletxean), Beasainen asteazkenetan (10:00-14:00, Martina Maiz, 3) eta Ordizian ostiraletan (09:00-13:00, arreta bulegoa). Goiekiren bulegoetan astelehenetik ostegunera ematen du zerbitzua, arratsaldez (15:00-17:30), eta herri txiki eta ertainetara tokian tokiko udalak eskatuta joaten da. Bi dira Energia Bulegoarekin harremanetan jartzeko bide nagusiak: 843 739 988 telefono zenbakia eta posta elektronikoko helbidea energia.goieki@goierri.eus.
Bonu sozialen eskaera igotzen
Kontsulta kopuru orokorrak ez ezik, bonu soziala bideratzekoak «nabarmen igo» dira aurten. 35 bonu sozial tramitatu dituzte azken hamar asteotan. «Bonu soziala argindar fakturan aplikatzen den deskontu bat da, eta udaletako gizarte langileekin koordinatuta bideratzen ditugu. Konexio horiek egitea aberatsa da. Ikusiko dugu artatutako pertsonen %50 pobrezia energetikoa pairatzen ari dela». Iazko urte bukaeran Irastorza sumatzen hasi zen gorakada hori berresten dute aurtengo datuek. Kontsulten %23 izan ziren iaz laguntza horri buruzkoak.
Bonu sozial elektrikoa zaurgarritzat jotzen diren kolektibo jakin batzuei zuzenduta dago. Lau baldintza hauetako bat bete behar da bonu sozialaren onuradun izateko: familia ugari izatea, gutxieneko pentsioa jasotzea, Bizitzeko Gutxieneko Diru-Sarrera (IMV) diru-laguntza jasotzea, edo bizikidetza unitatearen urteko errenta mailak bonu sozialak zehazten duen muga ez gainditzea.
Energia bulegoari aitortza
Hamabost hilabeteotan egindako lanaren aitortza modura, Goierriko Energia Bulegoak 2024ko Euskadi Kontsumo Saria jaso du kontsumitzaileak babestearen alde egindako lanarengatik. Hemen klikatuz ikus daiteke sari horri lotutako bideoa. ■
Argia eta gasa kontratatzeko jardunbide egokiak
Argindar edo gas hornidura kontratatzea ez da prozesu konplexua, baina baldintzak ondo aztertzen ez badira, espero gabeko kostuak edo baldintza desegokiak aurki daitezke. Fakturan ezusteko desatseginak saihesteko, hona hemen energia hornidura kontratatzeko eta kudeatzeko zenbait aholku.
- Aztertu zure kontsumoa tarifa aukeratu aurretik. Argiari dagokionez, aztertu zure kontsumo-ohiturak, ordu-bereizketa duen tarifa bat komeni zaizun jakiteko.
- Konparatu erabaki aurretik. Aldera itzazu eskaintza ezberdinak, ez geratu jasotzen duzun lehenengoarekin: merkatu arautua, merkatu librea… Zenbait tresna erabil ditzakezu, hala nola CNMCren konparatzailea, modu erraz batean zenbait aukera aztertu eta zure beharretara hobekien egokitzen den tarifa aukeratzen lagunduko dizu.
- Kontuz zerbitzu gehigarriekin. Eskaintza askok zure faktura handitu dezaketen eta behar ez dituzun hainbat mantentze-zerbitzu eta aseguru izaten dituzte. Egiaztatu badauden eta ezaba ditzakezun.
- Iraupen-konpromisorik badagoen begiratu. Konpainia batzuek iraupen-konpromisoak –permanentzia– ezartzen dituzte. Aldatuz gero, penalizazioak izaten dira. Begiratu interesatzen zaizun eskaintzak iraupen-konpromisoa duen ala ez.
- Kontratua irakurri sinatu aurretik. Eskaintza bat sinatu eta onartu aurretik, berrikusi kontratua eta ziurtatu prezioak eta baldintzak bat datozela aukeratu duzunarekin.
- Eskatu sinatutako kontratua. Hornidura kontratatu ondoren, konpainiak kontratua bidali behar dizu. Jasotzen ez baduzu, eska iezaiozu, etorkizunean behar izan baitezakezu.
- Atzera egiteko eskubidea. Kontratazioaz damutzen bazara edo aukera hoberik aurkitzen baduzu, gogoratu 14 egun dituzula kontratua penalizaziorik gabe bertan behera uzteko, baita iraupen-konpromisoa badago ere.
