Alberjinia beteak Kaxola erara
Osagaiak
- 2 alberjinia
- Kuiatxo 1
- Ziazerba sorta bat
- Tipulin bat
- Pikillo piper gorria 1
- Gatza
- Oliba olioa
Bexamela egiteko:
- Litro bat esne
- Koilarakada bat gurin
- 4 koilarakada irin
- Gatza
Prestaketa
Labea berotzen jarri. Bitartean, alberjiniak erditik moztu, eta laberako erretilu batean jarri. Olio zorrotada bat bota, eta labean sartu 20 bat minutuz. Atera, epeltzen utzi, eta koilara baten laguntzaz, barneko mamia atera, xehatu eta gorde.
Zartagin batean oliba olio zorrotada bat jarri eta su ertainean berotu. Lauki txikietan moztutako ziazerba eta kuiatxoa gehitu. Pikillo piperrak tiretan moztuta eta gatz pitin bat gehitu. Erregostean, sutatik kendu, alberjinien mami xehatua gehitu, eta nahastu.
Bexamela prestatzeko, lapiko batean gurina urtu su motelean. Lau koilarakada irin gehitu, eta gurinarekin ondo nahastu. Esnea beroa pixkanaka gehitzen joan, nahasteari utzi gabe, bexamel krematsua lortu arte. Ondoren, gainontzeko osagaiak zartaginera gehitu. Ongi nahastu, eta hozten utzi.
Alberjiniak ongi bete bexamela eta barazki kremarekin. Azken ukitua emateko, labean sartu 200 gradutan (indarra goian eta behean); lau-bat minutuz ongi gorritu arte mantendu. Gazta birrindua gehitu daiteke bexamelaren gainera, labean sartu aurretik. ■
Iker markinez • Kaxola
Sukaldaritzako ibilbide oparoa du Iker Markinez Munduatek, inguruko zein urrutiko jatetxe ezagunetan formatua. 21 urtean Ormaiztegiko Kuko jatetxeko nagusia eta sukaldaria izan zen. Gaur egun Beasaingo Kaxolan du ardura eta zeregina.
Kaxolaren proiektuak, kalitatezko sukaldaritza eta etxera prestatuta eramateko jakiak lotzen ditu, bertako obradore edo sukaldean mimo handiz landuak denak ere.
Garaiko eta ahalik eta gertueneko lehengaiak dira Kaxolaren abiapuntua. Lehen sektorearekiko konpromisoa ere bai. Ekonomia zirkularra sustatuz, gaurko gizarte erritmoan, etxeko egunerokotasuna erraztea ere badute helburu. Asmoa sinplea da: etxera eraman, jan eta gozatu. Baina produktu bakoitzak bere atzean, eskulana eta sorkuntza ditu.
