Itsas zapoa zerba krematan, ilarrekin eta zainzuriekin
Osagaiak
Lau lagunentzat
- 1.200 gr-ko itsas zapoa
- 80 gr ilar zuritu
- 8 zainzuri fresko
- Eskukada bat zerba
- Baratxuri ale bat
Prestaketa
Lehenik itsas zapoari bi solomo atera behar zaizkio. Soberan dauden buru eta hezurrekin salda egin, eta iragazi.
Ilarrak aletu eta zainzuriak zuritu. Ondoren zainzuriak arrainaren
saldatan egosi, gutxi gorabehera 6 minutuz.
Kazola edo zartagin batean baratxuria oliotan gorritu, eta bertan zerbak egin 2 edo 3 minutuz ura galdu arte. Ondoren salda gehitu eta 8-10 minutuz egosi, birrindu eta iragazi.
Zerba krema berotu, zapoa gehitu eta 2-3 minutuz egiten eduki. Ondoren ilarrak eta hiruzpalau puskatan zatitutako zainzuriak beste bizpahiru minututan eduki, ilarrak egin eta zainzuriak berotu arte.
Platereratu eta jateko prest dago. ■
Iñaki Telleria • Kuko jatetxea
Gasteizen 1993. urtean jaio zen Iñaki Telleria. Baina sukaldari bezala Goierrin finkatu zen, duela hamar urte baino gehiago. Lehen hiru urteak Ordiziako Oiangu Baserrian egin zituen eta ondorengo bostetan Mutiloako Ostatuko ardura eraman zuen. Gaur egun, Ormaiztegiko Kuko jatetxean aurkitu du sukaldaritza ulertzeko duen modua garatzeko txokoa.
Bere sukaldaritzaren oinarria «azokako janaria» dela dio. Egunero Goierriko azoka eta dendetan erosketak egin eta merkatuan aurkitzen duen hori prestatzen du, garaian garaikoa. Astelehenetik ostegunera hiru menu desberdinetan prestatzen ditu: Egunerokoa, Pikoteoa eta Azokakoa. Ostiral eta larunbatetan, berriz, Azokako menua bakarrik zerbitzatzen dute.
