Rufino Iraola -
Rufino Iraola
Rufino Iraola
Dakizuenez, berriki «demostratu» dute argia baino bizkorragoa dela ‘neutrino’ izeneko partikula. Oraingoan ez dute egin Ipar Amerikan esperimentua, baizik eta Europan, konkretuki Suizako ‘Conseil Européen pour la Recherche Nucléaire’n, euskaraz INKE? –Ikerketa Nuklearrerako Kontseilu Europarra–. Hamaika herrialdetako 160 adituk hartu dute parte. Kasik atzemaezinak dira «bitxo» horiek, baina hor zegoen hipotesia 1930ez geroztik, Wolfgang Paulik formulatua, eta 1956 aurkitu zituzten.
Gauza harrigarriak badira, baina hauxe ere! Materia, neutrinoarentzat, transparentea da; esate baterako, kristala argiarentzat bezalatsu. Eguzkiaren nukleoan sortzen dira neutrinoak, fusio nuklearren erreakzioetan. Dirudienez, arrunt ugariak dira Unibertso osoan. Zalantza egon da –kasik gaur arte– neutrinoak masarik ba ote duen. Azkenean, fisikoek erabaki dute baduela masa, nahiz eta hagitz txikia den. Elektroiak baino hamar mila aldiz gutxiago pisatzen du.
Orain falta den bakarra, hipotesia baieztatzea; beste aditu batzuek frogatzea. Urte batzuk joango dira oraindik horretan. Baina, azkenik, frogatuko balitz, erlatibitatearen teoriari berari erasango omen lioke. Niri ez galdetu zergatik eta nola. Erositako prezioan saldu, besterik ez dut egiten.
Jende askok esango dit nola arraio! ausartzen naizen gauza horiei buruz mintzatzera. Oso erraza. Imanol Lazkanoren teoria aplikatzen dut: «Zoazte lasai –epaimahaiko–, ez duzue asmatuko eta!» Zergatik ez dugu hitz egingo neutrinoaz, Jainkoaz hitz egitera ausartzen bagara? Ez dakit ohartzen garen, baina zer dakigu egunero erabiltzen ditugun hainbat aparaturi buruz? Zer dakigu, adibidez, ontzi-garbitzekoaren barne funtzionamenduaz, GPSaz, elektrizitatea zer den, klinikan aztertzen gaituzten hainbat makina eta laborategiren gainean? Zer ulertzen dugu kolesterola altu edo ondo daukazula esaten digutenean? Nola irudikatzen duzu, planeta hau, unibertsoarekin konparatuta, hondar-ale bat baino txikiagoa dela esaten dizutenean? Edo milaka milioi galaxia daudela aditzen duzunean? Zergatik ez du izan behar ‘neutrino’ hitzak ‘hidrogeno’ bezain normala?
Hain zuzen, zer dakigu hidrogenoa eta oxigenoari buruz? Ura da bi elementu horiek elkartzen diren likidoa, baina parodoxikoki, ura begiratuta, ikusita, ez dakigu deus ere bi horiek, banaka, nolakoak diren. Kimikikoek jakingo dute. Beraz, inolako alternatibarik gabe, kimikoei sinestera behartuak gaude.
Aurreratu dugunez, ia-ia tutik ere ez dakigu «egunero» esku artean dtugun aparatu asko eta askoren barne izaeraz. Eta nola konpontzen gara? Irudimena erabili behar izaten dugu. Gauzak irudikatu egiten ditugu. Ez dago beste erremediorik. Gehiago esango nuke. Zientzialariek zer dakite? Zientzilariek fisika kontuan, batez ere, matematika dakite. Zientziak fenomenoak deskribatzen ditu. Ordea, fenomeno horien azpian dagoenaz zer? Inork ez daki ezer substantziaren benetako esentziaz. Zientzialarien aurkikuntzei esker sortzen dira teknologia berriak; hala eta guztiz ere, nireari eusten diot: inork ez daki ezer fenomenoen azpian dagoen historiaz, intentzioez, xedez… Eta oraindik aurkituko dituztenak! Galdera sinple bat, edo bi: nori zor zaizkio naturaren pontentzialitateak?, eta nork du oraindik aurkitu ez dugunaren kontzientzia? Transzendentala da bi galdera horiei erantzutea. Jainkoagatik esan daitekeen gauza bakarra da: DA. Akto hutsa da. Ez potentzia.
Egia esan, gero eta fede gehiago behar da Jainkoan ez sinesteko. Baita guri erakutsi diguten Jainko horrengan sinesteko ere. Beraz, Orixek behiala esan zuen eran, «Jainkoaren bila» hastera noa. Jainkoa ez dago ezagutzerik, baina premiazkoa dut haren ideia berri bat, antropomorfismo guztietatik aldendua.
Zientziak, jakinekoa denez, informazio ugari ematen digu fenomenoen gainean, baina gure sentimenduekin zerikusia duenari buruz ez digu ezertxo ere argitzen. Ez digu ezer esaten, era berean, gauzak honela edo horrela zergatik diren, direla baizik. Ez du ezer esaten ederrari edo itsusiari buruz, ona eta txarraren gainean. Erakutsiko digu sendatzen, baina medizinak sortzen dituen problema asko ez ditu konpontzen zientziak, etikak baizik.
Jainkoa eta gizakiarekiko lotura kulturan ikusten da. Kulturak lau eremu nagusi ditu: zientzia, filosofia –teologia filosofiaren barnean dago–, artea eta mistika edo espiritualtasuna. Kulturaren parte horiek, bakoitzak bere erara, uztartzen dute batura. Horiek dira Izatearen lau hankak, Izatearen etxearen lau hormak. Den guztiaren adierazle eta espresio. Bakoitzak bere funtzioa du: zientziak fenomenoak deskribatuko ditu, teknologiari oinarria eskaini, baina beti zerbait ezkutuan utzita; ez hala nahi duelako, besterik ez duelako baizik; filosofiak, batez ere, arrazoiaren bidez interpretatu egin behar ditu gertakariak, filosofiak erregulatu behar ditu gizakien arteko harremanak, pluralismo eta lege egoki eta zuzenen bidez, besteren ideia eta pentsakera errespetatuz…; arteak lagundu behar digu barruan daramagun izaki kreatzailea ateratzen, bakoitzak bere espresabidearen esparruan; arteak igo egiten gaitu duintasun mailan, gerturatu egiten gaitu Adimen Unibertsalera, kreazioan parte hartzea da…; eta mistika edo espiritualtasunak, azkenik, dena uztartzen du, gizakiari dimentsio totala emanez, eliza eta kredo guztien gainetik; espiritualtasuna da Misterioan murgiltzea, lotura absolutua…
