Itsasondoko haurreskolak, eskolak, guraso elkarteak eta udaletxeko suspertzaileek lan taldea osatu dute. Besteak beste, 0-30 urte bitartean herriak eskaintzen dituzten aukerak ezagutarazi nahi dituzte. Ildo horretan, ekintza ugari egiten dituzte urtean zehar Itsasondon.
Eguzki Lore ludotekak martxan jarri duen Familia Giroan programa da horietako bat:
0-10 urte bitarteko haurrentzat eta beraien gurasoentzat zuzendua dago programa. Guraso txokoan eta ludotekan egoten diren haurrak eta familiak gonbidatu nahi dituzte Familia Giroan programako ekintzetan parte hartzera.
Gabonetan, adibidez, Idiazabalera joan ziren. Batetik, Idiazabalgo Gaztaren Intererpretazio zentrua ezagutzeko aukera izan zuten, eta horrez gain, Aranburu baserrian, gazta egiteko makineria ezagutu eta ondoren, gazta probatu eta erosi zuten. «Arratsalde polita pasatu genuen», diote arduradunek.
Trufazko bonboiak
Hurrengo ekintza ere prest dute dagoeneko itsasondoarrek. Otsailaren 18an, asteartean, arratsaldean, trufazko bonboiak egiten ikasiko dute Itsasondoko haurrek zein gurasoek.
Horri lotuta, eta antolaketa lanak errazteko, derrigorrezkoa izango da aurrez izena ematea, otsailaren 10etik 14ra bitartean, udaletxean bertan, edota posta elektroniko bidez: ainara@itsasondo.net.
