Iñigo Sbeltzari (Zumarraga, 1983) umetatik gustatzen zaizkio kamerak, eta zuzendaritza eta gidoigintza ikasi zuen Madrilen.
Txikitatik gustatzen al zaizu ikus-entzunekoen mundua?
Mundu hau betidanik dut gustuko. Txikitan aitaren kamerarekin jolasten nuen. Panpinekin istorioak egiten nituen. Argazkiak ateratzen nizkien eta stop-motion teknikarekin mugimendua ematen nien.
Ze ikasketa egin zenituen?
Beti izan dut ikus-entzunezkoekin lotutako zer edo zer ikasteko asmoa, baina gurasoek lehenengo etorkizun oparoagoa duen zer edo zer ikasteko esan zidaten. Informatika ikasketak hasi nituen, baina ez nituen bukatu. Ondoren, mantentze-industriala ikasi nuen. Mein lantegian hiru urte eman nituen eta aurreztutako diruarekin Madrilera joan nintzen zine ikasketak egitera.
Ze lan egin dituzu?
Bideoklipen mundua gustuko dut eta asko egin ditut. Josu Bergara, Txapelpunk eta Alacanteko The Liarla taldearentzat, besteak beste. Orain Hesian taldearentzat lan egin dut eta hurrengoa Ira taldearena izango da.
Zaila al da bideoklip bat egitea?
Ez da zaila, baina gauza askotaz arduratu behar da. Lan taldea osatu behar dut, gidoia idatzi, attrezzoaz arduratu, taldearekin gelditu… Lan asko da pertsona batentzat, baina maila honetan ez dago dirurik.
Euskal Herrian bideoklip egile asko al zaudete?
Hemen egiten diren bideoklipak oso xumeak dira. Musikariak jotzen jartzen dituzte, eta kito. Ni beste puntu bat ematen saiatzen naiz. Euskal Herritik irten nahi dut, baina horretarako erein egin behar dut lehenago.
Asko gustatu zaizun bideoklip bat?
Beck abeslariak Charlotte Gainsbourg-ekin egin duena, adibidez: Heaven can wait. Michel Gondry-ren lanak ere asko gustatzen zaizkit.
Zein da zure ametsa?
Zine mundutik bizitzea, bai pelikulak eginez eta bai bideoklipak eginez. Gaur egun, pelikulak egitea oso erraza da, baina zure lana zabaltzea oso zaila. Egun, ETBn nago: Zuek hor eta gu hemen programan (Kontrako eztarria zena). Bigarren errealizadorea naiz eta esketxak grabatzen ditut. Oso gustura nago. Umorea oso gustuko dut eta gustatzen zaidana egiteagatik ordaintzen didate.
