Gazta berriaren garaia, Artzain Egunarekin bat
Pazko asteko asteazkenarekin batera, hilaren 24an, egingo dute Artzain Eguna, Ordiziako aparteko azoketan lehena. Idiazabal Gaztaren denboraldiari hasiera emango diote, gazta ebakita. Artzainek beraien artaldeak mendira igotzen dituztenekoa ere irudikatzen dute, ehunka ardi Ordiziako kaleetatik barrena pasata. Ardi eta aharien erakusketa, gazta eta mamia egiteko erakustaldiak eta ardiei ilea nola mozten dieten ikusteko aukera izango da. Aurten gainera, Ordiziako azokan hainbestetan izan den Juan Mari Arzak sukaldariari buruzko erakusketa ere jarriko dute.
Antion eta Saturdin Pazko bigarreneko festa
Pazko bigarrenez, apirilaren 22an, erromeria giroko jaia izango dute Zumarragako Antio ondoko zelaian eta Zaldibiako Saturdi auzoan. Ume jolasak, herri kirol erakustaldiak, eta bertsolari eta trikitilariak izango dira paregabeko bi ingurune horietan. Apirilak 22. Antio (16:30). Saturdi (egun osoan).
Urretxun Poligrafo Fest jaialdia
ZarraparraZ kolektiboak antolatuta, Poligrafo Fest musika jaialdia izango da Urretxun. Stupiditos, Sonic Trash, Sex Museum, Screamers &Sinners eta Izaki Gardenak taldeek joko dute. Sarrera doan da. Apirilak 13. Urretxuko Gernikako Arbola plaza (13:00).
