Osagaiak
(4 pertsonentzat)
- 24 bakailao kokotxa fresko
- 12 pikilo piper
- Oliba olioa
- Perrexila
Prestaketa
Kokotxak
Bakailao kokotxak zartagin batean markatu. Lehenik azalaren aldetik gorritu, buelta eman eta beste pixka bat egin. Zerbitzatu aurretik labean eman azken berotua. Egindako ontzian eraginez pil-pil bat lortu, gero aurkezpenean erabiltzeko.
Piperrak
Piperrak olio, gatz eta azukre pixka batekin zartaginean ondo egin behar dira. Su apalean 40-45 minutuz, mehetu arte eduki.
Aurkezpena
Piperrak eta kokotxak txandakatuta jarri platerean eta aurrez lortutako pil-pilarekin aurkeztu. Perrexil olioa ere jar liteke.
Garaikoa eta kalitatezkoa, Zezilioneako ikurrak
Duela 20 urte hartu zuten Ugutz, Izaro eta Juanito Rubiok Olaberriko Zezilionea hoteleko eta jatetxeko ardura. Beraien sukaldaritzan garrantzi handia hartzen du kalitatezko eta garaiko produktuekin lan egiteak.
Zezilioneako tabernan eguneko menua jateko aukera dago. Gustu handiz dekoratutako jangelan, berriz, karta zerbitzua, dastatze menua eta taldeentzat menuak eskaintzen dituzte Rubiotarrek.
Jateko aukera zabala izaten dute, beti ere, garaiko produktuari duen garrantzia emanez. Parrilan egindako haragiak eta arrainak ere eskaintzen dituzte.
Baina Zezilionean zerbait deigarria gertatzen bada, eskaintzen duten ardo aukera zabala da. Bertako upategian 300 ardo desberdin dituzte, Errioxatik hasi, eta Espainiako zein munduko jatorri izendapen ugaritakoak. Ardo dastaketak ere antolatzen dituzte.
