Olentzero maitea:
Aurten gauza garrantzitsu bat eskatu nahi nizuke, beraz, lerro hauek aprobetxatu nahi ditut era publiko batean egiteko, eta horrela, gutun hau galtzeko arriskurik egon ez dadin, txikia nintzela bizikleta bat eskatu nizunean gertatu zen bezala.
Badira hiru urte pasatxo nire ardurapean taberna bat izan nuela, eta oilo ipurdia jartzen zait egungo egoeran oraindik taberna dudala imaginatzen dudan bakoitzean. Jakin badakit garai zailak direla sektore guztientzat, eta agian, osasun sailera bideratuta izan beharko lukeela nire eskakizuna, baina tabernaria izan naizenez, amorru berezia sentitzen dut nire lankide ohiak pandemia honetan jasaten ari diren bidegabekeriekin.
Denok ematen diogu osasun publikoari lehentasun eztabaidaezina, eta birusa heda ez dadin, etsipenez onartu ditugu azken hilabeteetan inposatu zaizkigun eskubide murrizketak. Ostalaritzak bereziki, euren establezimenduetako prebentzio eta higiene neurriak pentsaezinak diren mugetaraino zorroztu dituzte, hala eskatu baitzaie, eta azken hilabeteetan inexistenteak izan diren irabazietatik inbertsio izugarriak egin dituzte hori lortzeko. Eta ahalegin hauek guztiak saritu beharrean, euren ogibidea nola hiltzen den pairatzen ari dira.
Bai, tabernetan era arduragabe batean jokatzen duen jendea dago, baina jende horrek ez al du bere bizitzako beste edozein esparrutan arduragabekeriaz jokatzen? Eta gobernua ez al da arduragabekeriaz jokatzen ari jendea beste azalera batzuetan pilatzen utziz? Supermerkatuetan, garraio publikoan, eskoletan, enpresa handietan, eta abarretan ez al dago arriskurik? Zergatik zigortzen da ostalaria besteen arduragabekeriaz?
Olentzero maitea, birus hau desagertzeko eskatu nahi nizuke, justizia, koherentzia eta elkartasuna eskatu nahi nizkizuke. Baina badakit hau dena ez dagoela zure eskuetan, badakit ezin duzula miraririk egin. Horregatik, ostalari bakoitzari baselina poto bat eramateko eskatzen dizut. Izan ere, ostalaritza pandemiaren errudun bakar bezala seinalatzea da norbaiten interesa, eta dirudienez, datozen hilabeteetan eta egoera hau amaitu arte langile xume hauei ipurditik gogor ematen jarraituko dute