Igor Aranburu • Autowag Volkswagen Audi (Beasain)
Neguak berezko dituen baldintzetara egokitzeko eta errepidean segurtasunez ibiltzeko, komeni da autoa baldintza onetan edukitzea. Besteak beste, pneumatikoak, bateria, kristal garbigailuak, likidoak… egoki dauden begiratu behar da, errepidean goazenean, ezustekorik ez izateko.
- Pneumatikoak: Lehenik eta behin, gurpiletan jarri behar da arreta. Euriarekin, izotzarekin eta elurrarekin, kubiertak baldintza onetan egotea da garrantzitsuena, segurtasunari begira. Negurako pneumatikoak badaude ere, batez ere Lau urtaroak deitzen zaienak jartzen dira gero eta gehiago, urte guztirako egokiak direlako. Dena den, mota batekoak edo bestekoak eduki, pneumatikoen marrazkiaren sakontasunari erreparatu behar zaio bereziki.
- Izotzaren aurkakoa: Batez ere, kanpoan lo egiten duten autoei, izotzaren aurkako likidoa botatzea gomendatzen da; zeropeko 25 gradura bitarteko hozberoetarako egokituta baitaude. Gainerako likidoen (olioa, balazta, kristal garbigailuena, errefrigeratzailea…) mailak ere neurtu egin behar dira.
- Erralentian: Hotza egiten duenean, eta batez ere, kanpoan lo egiten dutenen kasuan, autoa arrankatu eta erralentian edukitzea komeni da, olioak eta autoaren sistema guztiak tenperatura egokia hartu dezan.
- Bateria: Kontuan izan behar dugu hotzarekin gehiago sufritzen duela bateriak, gehiago deskargatzen dira. Auto elektrikoen kasuan ere berdin, ohi baino karga gehiago izatea beharrezkoa da, berogailuarekin kontsumoa handiagoa baita.
- Leihoetako bapainua edo lurruna: Ikusgarritasuna ziurtatzeko, lurruna kentzeko gailuak ondo funtzionatzen duela ikustea ere garrantzitsua da. Era berean, kristalak garbitzeko gailuak eta likidoa egoera honetan edukitzea ere ezinbestekoa da.
- Depositua beteta edo bete samar edukitzea ere gomendagarria da, elurteren batek bidean harrapatu eta gelditu behar izanez gero. Kateak eta mantaren bat autoan eramatea ere garrantzitsua izaten da negu garaiab. Eta jakina, izotza kentzeko balio dezakeen gailuren bat ere bai.