Idoia Luzuriaga Garcia • Berdintasun aholkularia
Modan dago feminismoaz aritzea eta feminista zarela argi uztea. 40 urte betetzen dituzunean, kirola modu aktiboan egiten hastea bezela, horren aurretik kiroldegiko atea non dagoen ez dakizun arren eta zure ipurdia elastiko batean inoiz sartuta ikusi ez duzula ere. Ez dakit zer moduko berezitasuna edo berritasuna den. Ni gazteagoa nintzenean, zure burua feministatzat definitzea edo kolore berdea zure kolore maitatuena zela esateak egoerarik onenean antzeko efektua zuen nire herrian; zero. Zure burua feminista militantetzat definitzea ez zitzaizun burutik pasatzen, ez baitzegoen militantzia hori egiaztatzeko jarduera handirik. Beno, gozagarria da feminismoa, eta haren pentsamenduak, korronteak, ezagutzak, jarrerak eta bizimoduak hartu duen indarra. Egun gure gizartean duen tokia eta gazteengan duen errotzea. Baina feminismoaren ikuspegiarekin bizitzaren teorizazioak asko harritzen nau. Hots, inoiz zaindu ez duenaren zaintzaren gaineko egituratze feminista, tentel baten antzera maitemindu ez denaren amodio erromantikoaren inguruko epaiketa, edo politikan emakume lider txatxurik jasan ez duenaren jarrera metaberdinzalea. Ni feminista naiz, eta nire inguruan bizi den jende asko ere bai. Horrek ez gaitu bereziagoak egiten. Borroka, bide, eraldatze edo nahi duzuenaren ildo berean ari gara. Baina ez da etiketa bat. Jarrera bat da. Eta ez dago bere jarreran ehuneko ehunean koherentea dela erakutsi nahi duenik, nire mesfidantza jasoko ez duena. Esan nahi dut, feminista izatea garela esateak ez du esan nahi horrekin dena eginda dugunik ezta inoiz jarrera matxistarik izango ez dugunik ere, ezta beste inoren gaineko joera diskriminatzailerik erakutsiko ez dugunik ere. Horregatik, egun,enpresatan berdintasun planak jorratzen ari garelarik, pantailaz bestaldeko bileratan bere entitatean super berdinzaleak direla esaten didatenean, berehala pizten zaizkit alarmak. Baita ere eszenatoki gaineko feminismoa jorratzen den giroetan. Nor ala nor feministagoa dela neurtzen den ekitaldietan. Edozein gai matxismoaren bahetik pasatzen eta diskurtso feminista papagai baten moduan ikasi eta plazaratzen diren telebistako tertulietan. Eta nola ez, feminismoa bere kanpainen erdigunea egiten dituzten politikariengan. Ez dut jasaten feminismoaren inguruan dagoen zuzentasun politikoa eta eszenaratze teoriko-akademiko perfektu hau. Feminismoa ez da orain batzuek asmatu duten zerbait. Orain deskubritu dionari, zorionak, gozatu, eta ongi etorri.
