Gorka Lariz • Aktorea eta Urrup taldeko kidea
Hirurehun eta hogeita hamahiru egun pasa dira, hirurehun eta hogeita hamahiru egun eta kontatzen.
Hirurehun eta hogeita hamahiru egun zu ikusi gabe, zure babesa izan gabe, hain da gogorra zure epeltasuna, berotasuna edo sua ez sentitzea, non batzuetan poliki-poliki itzaltzen nindoala sentitu baitudan. Zorionekoak hirurehun eta hogeita hamahiru egun luze hauetan zurekin izateko aukera izan dutenak. Zurekin, zuregatik eta zugan bizitzea izan daitake bizitzan izan dudan ametsik gozoenetakoa, baina egoera ziztrin, neketsu eta nazkagarri honek banandu egin gaitu. Zurekin egoteko irrikan nago, zure energia arnasteko gura sentitzen dut, zu sentitzeko desira. Geroz eta gehiago. Geroz eta indar handiagoarekin.
Zure falta sumatzen dut.
Zure indarra sentitzearekin, zure presentzia soilak, edozer gauza izan eta egiteko gai naizela sumatzen dut. Printze, errege, bufoi, gizon boteretsu naiz eskale edo rock izar garrantzitsu…
Hirurehun eta hogeita hamahiru egun bai, baina geroz eta gutxiago gelditzen da berriz ere elkar ikusi eta sentitu ahal izateko. Ene oholtza maitea, berriz ere izango gara biok bat, zu zara eta enbor ustel honen ama lurra. Zurekin, biok elkarrekin berpiztuko gara.