Ederragorik gutxi. Sentituko duzu badoakizula zilborrean gora kilima segida bat, egingo dizula hozka ezagutzen ez duzun orrolariren batek, bularren artean bihotza ez den beste zerbaitek estutuko dizula arnasa. Sentituko duzu hazkura benetakoa dela.
Goizetan, esnatzen zarenean, bat irakurriz gero, eguna jolas bihurtuko duzu. Edo goizetan, esnatzen denean, bat irakurtzen badiozu, eguna mundu bihurtuko diozu. Hizki, hitz eta irudien arteko nahas-mahasak irristan eramango zaitu poema bakoitzaren baratzera. Ezkutuko piztiek eta ageriko xomorroek aho-huts eta ezpain-bete egingo dizute algara eta desioa bat eta bakarra izango da, liburuan barrura sartu nahi izatea.
Leire Bilbaok eta Maite Mutuberriak ondutako poema-ilustrazioez osatutako Xomorro poemak eta beste piztia batzuk liburuak Haur eta Gazte Literaturako Euskadi Saria lortu zuen 2017an. Haur bati egin diezaiokezun oparirik ederrenetakoa liburu honetatik goizero olerki bat irakurtzea da. Zeure buruari egin diezaiokezun oparirik ederrenetakoa liburu honetatik goizero olerki bat irakurtzea da. Izan ere, ederragorik gutxi goizetan basoko piztia-xomorroek «ilargia ostu dute, ilargia ostu dute!» oihukatzen dutela entzutea baino. Izan ere, ederragorik gutxi hodeiak gure loari ihes egin ostean hegan egiten duten ardiak direla irudikatzea baino. Izan ere, ederragorik gutxi zerriak zuen zorriak zerbait zor zuela ulertzea baino. Ederra hori baita, irakurtzen duzun hori zure begien kulunkatik sinestea.