Katalina Goia –erdian–, alabekin, Indar lantokiko sukaldean. / Ondojan.com
Goierrin garrantzia handia izan duen emakumezko bat da lerrootan hizpide. Garrantzi handia izanagatik, aldi berean, ezezaguna dena. Katalina Goia Murgiondo sukaldaria da gaurko pertsonaia. Goierriko emakume asko eta askorentzat erreferentzia izandako mutiloar-segurarra, eta goierritar ugariren sabelak poztu dituena.
Beste emakumezko askorekin gertatzen den bezala, sukaldari goierritarrari buruzko informazioa aurkitzea kosta egiten da. Segurako Hariz hari sorgindu hadi! ibilbide didaktikoak bistarazi nahi izan du, Ondojan.com gidak arakatu zuen Katalina Goiaren bizitza.
Mutiloan jaioa (1911) eta haurtzaroan Segurara bizitzera joana zen Katalina Goia; Seguran hil zen, 1979an. Gaztetan Bizkaiko hiriburura, Bilbora joan zen neskame eta jabeek, Katalinak sukalderako zuen trebetasunaz jabetuta, Bilboko bertako eskola batean sukaldaritzaren inguruko sekretuak ikasteko aukera eskaini zioten. Eskolak ondo jaso zituen Katalina Goiak, bere bizitza sukaldaritzatik osatu baitzuen.
Sukaldaritza liburua
Segurako unitate didaktikoaren esanetan, «herrira itzulitakoan Goierriko hainbat baserritan ezkontzako banketeak antolatzen zituen, baita Segurako Imaz jatetxean ere».
Bestalde, 60ko hamarkadatik jubilatu artean, Beasaingo Indar enpresako sukaldeko arduraduna izan zen, bere bi alabekin batera.
Sukaldaritzari buruzko bere ezagutzak Libro de cocina izeneko liburuan jaso zituen. Catalina Goya de Echezarreta izenarekin sinatua, Tomas Etxezarretarekin ezkondutakoan senarraren abizena hartuta. 174 orritan 500ndik gora errezeta jaso zituen: sarrerakoak, arrainak, haragiak, postreak eta izozkiak ataletan banatuta.
Ikastaroak herriz herri
Bilbon ikasitakoa Goierrin erakusten aritu zen Katalina Goia eta ikastaroak eman zituen herriz herri. Ikasle gehienak emakumezkoak izan bazituen ere, gizonezkoak ere joaten omen ziren. Horietako bat izan zen Karlos Argiñano beasaindar sukaldaria.
Oraindik ere Katalina Goiaren esentzia bizirik dago Goierriko sukaldeetan, belaunaldi arteko transmisioari esker.
