Xabin Fernandez Zubeldia • Aktorea
Herritar maiteok. Egun historiko honetan, harrotasunez idazten dizuet, Goierri independentearen zutabe sendoak eraiki ditugunon izenean. Hamarkada bat igaro da gure gizarteak aldaketa handia abiatu zuenetik, eta gaur, etorkizun justuago, berdinzaleago eta baketsuago baten errealitatea ospatzen dugu. Hasieran ezinezko zirudiena lortu dugu, denon parte-hartzearekin, eta hori ezin dugu inoiz ahaztu.
Hamarkada bat igaro da mundua aldatu genuenetik. Gaur, gainerako nazioak begira ditugu, harrituta eta miresmenez. Guk erakutsi dugu beste bide bat posible dela.
Aste honetan beteko dira hain justu hamar urte generoaren kontzeptua errotik desagertu genuenetik. Gizon eta emakume izateari utzi genionetik. Milaka urtetan sostengatutako gezur inposatuari boterea kendu genionetik 2065eko udaberrian; ordutik, nor garen, nola bizi nahi dugun eta gure komunitateari zer ekarpen egiten diogun da benetan garrantzitsua.
Goierritarron nortasuna ez da kategoriatan sartzen; gure izatea da gure askatasuna. Zorionak beraz zuetako bakoitzari, jarri nahi izan dizkiguten oztopoen gainetik tinko heltzeagatik gure bideari.
Badugu aste honetan ospatzeko beste arrazoi bat ere. Pasa den astean ireki baitzituen ateak Segurako Osasun Aurreratuaren Zentro Espezializatuak. Hemendik aurrera, bertan izango da azken minbizi kasuei aurre egiteko orain bost urte gure osasun komunitateak eskuratutako Xn54 izpi ultrafinen kodifikatzailea. Zentroko zuzendariorde Enaitz Garmendiabarrenaren esanetan, 2080. urterako errotik desagertuko da minbizia Goierriko Errepublikan.
Bestelakoan, Legorretako hondartza eta Uzturre irla batuko dituen teletrasportazio atearen lanak abiatu dira. Ondo bidean, datorren neguan posible izango da Tolosaldeko lurrak bisitatzea. Azken irla honekin, Legorretako Ontza teleportuak 27 helmuga izango ditu bere eskaintzan, iaz Jaizkibelera eta Igeldora joateko ateak zabaldu ostean.
Amaitzeko, Ordisaingo koordinaziotik jakinarazi digute hogei herritar behar direla Granadako Errepublikatik uda pasatzera etorriko diren errefuxiatu klimatikoak jasotzeko. 25 eta 130 urte artean badituzu, eta interesa baduzu, bidali zure GAG zenbakia ordisain200 kode ontzian.
Izan bedi aste berri hau guztiontzat oparoa eta askatasunez betea.
Segi dezagun aurrera, tinko. Goierri gara!
Goierriko Errepublika Independentea. Boletin Ofiziala – 2075eko martxoak 28. ■
